DOMINGO, ENERO 29, 2006
Irías a la sierra.
Iríah a la sierra,
a ondeá ayí tu melena negra,
a regal la tierra con lah tuh venah.
...
El caminu’e la sierra
...
Sí,
ibah a la sierra,
Dulce y decidía
y era largu,
mu largu el caminitu,
rayandu ehtaba el día.
Sí,
ibah al su encuentru
en una yegua
primeriza y nobli,
comu’na primavera.
...
Ibah a buhcal·luh,
a loh guerriyeruh que murierun,
a loh chozuh, a lah cuevah,
a loh corazonih dulmíuh
que habitan entri lah piedrah.
Ibah,
sí, en buhca’e aqueyuh jombrih
que
murierun
a
la sombra de la'ehtoria.
...
Y velayili ehtaban luh cabreruh
y arzaban la cayá
con la su voz valienti y añeja
pa guiarti.
Hablan luh cabreruh
...
¡Por’ayí, por’ayí arribina
ehtaban ahcondíuh!
Pregúntali a Vitoria
c'anda endurzandu la zurrapa
pa tupil·luh bien tupíuh,
porqui pasan mucha jambri
y tienin luh pieh engurdíuh
luh probecinuh guerriyeruh.
........................
...
Ayí mehmu,
Dulce,
al lainu la choza’e piedra
vihtih a Vitoria,
la Rica Miel y la memoria,
y ehtaban con’eya loh cabreruh'e la sierra:
tíu Adolfo el Cayau pal Robleu,
Venancio en lah’Erah'ondah,
Adolfo Izquierdu y la Morena,
tamién luh Chilinih…
y luh lobuh y lah fierah.
...
Habla Dulce a luh cabreruh
...
Oyi, si luh véih dicil·luh
que la libertáh eh sagrá,
que no s’abajin pa ná de lah majáh,
entri lah majanerah’e piedra.
...
Habla la Rica Miel, la cabrera
...
Si, sí, yo loh ví el’otru día,
a luh maquih,
aquí mehmu,
al lainu la juenti.
Yo cantaba y jacía el quesu,
¡menudu suhtu me dierun!
hahta que caí qu'eran eyuh,
Y luh tupí bien tupíuh
de sueru y jiguh secuh
y eyuh bien m’agraecierun.
Y al’otru día que vinierun
matamuh unuh guarrapinuh,
malandarih al dehteti,
qu'ehtaban mu gordinuh,
y ali payá,
moh luh comimuh con’eyuh
y moh luh pagarun,
eran genti m'umildi y mu güena.
Habla Dulce
...
A mi me lu’iju Pinto
c'andaban paquí embohcauh
deci luh tiempuh aqueyuh
y subimuh enseguía pa la sierra,
valientih, sin miéu angunu,
con lah’alforjah yenah
de’ilusionih y de’ideah.
En'el airi
la voz de luh muertuh
era un ecu que gorvía
comu'n rayu d'ehperanza:
¡Echa un tragu vinu, amigu,
pa rompel ehti exiliu
que moh comi lah entrañah
comu'n buitri carroñeru!
...
Tía Consuelu la cabrera
...
ehprimiju abaju.
Asín l’había veníu la cunucencia,
rehfalandu suavimenti
por la sierra’e Cabezuela.
Hahta que, a luh cuatru añuh,
se recunució a la vía
en un castañal
mirandu lah’ehtreyah.
........
Un platinu d’ aveyanah
que por’el día s’ehcondin
y por la nochi s’ehparraman.
...
Luh maluh
...
Payí se muevi argu,
maríu,
mira a vel si son luh maluh
con el tricorniu a la cabeza,
ay, que no, so tontu,
que son de luh muehtruh,
que train la libertá en la mirá
y un sueñu en bandolera:
Pintu, c'alegría,
y vieni con’el tíu Picoti,
¡qué güena cumpañía!
Amuh, amuh,
entral por'esa puerta
pa’entru a la majá,
que oh vu’a tupil de sueru
hahta que oh'impléih bien himplauh,
comu loh chivinuh por lah tardih
candu ayegan lah cabrah al chiveru
y se ponin loh’ociquinuh albedríauh
chuperreteandu'e la ubri luh calohtruh.
...
Habla Dulce
...
Yo luh vi,
a luh valientih guerriyeruh,
en el cielu y en luh güertuh,
y yenaban a borbotonih,
con el sueñu d'otruh tiempuh,
luh güecuh fríuh'e lah balah
en'ehpera de luh besuh.
...
Habla tía Consuelu, la cabrera
...
Mira, Dulce,
mira bien parriba,
payí ehtá el Camochu'e la Gama
y el su jermanu Majalahnu
y la cueva de luh Maquih,
ondi no farta l’ehperanza.
Dali a esa jaca lozana
paque te suba jahta eyuh
comu a una hermana.
...
Habla Dulce
...
Amuh bien a priesa,
mi cabayu volanderu,
amuh,
amuh ayí arribina,
a divisal como lo hacin lah’aguilah
endi el cielu.
...
Habla tía Consuelu
...
Tíu Misinu
en luh prauh'e la sierra,
qu'ehtán paríah lah guarrapah
y tieni tiempu pa’ordreñá lah cabrah.
Po'la nochi moh guardamuh
en un caseretinu
y vemuh pasau muchu miéu
en'esuh añuh'e la guerra.
Comu aqueya veh
c'abían yegau
luh civilih por la nochi
y hacía muchu fríu,
Trohtearun a la puerta,
y ayí se quearun a la lancha la lumbri
jahta que s’abajarun lah’ehtreyah.
Aluegu ya su juerun
con vientu ehpesu.
Ojalá nunca güervan.
...........
...
lah cabriyah se ponin al’amanecel.
.............
Aluegu
ya se juerun
con
vientu ehpesu.
¡Ojalá
nunca güervan!
Peru eyuh siempri, siempri
luh güenuh guerriyeruh
siempre ehtuvierun con musotruh
y si no,
mira comu vienin a la juenti
luh suh'amiguinuh
a buhcal el’agua frehca
a l'ehtanti que la sed aprieta.
...
Habla un cabreru’e la sierra
...
Si, sí, se m’aparecierun,
unuh guerriyeruh,
y m’ijerun que conmigu no’iba náa,
que no juera usau abril’a boca.
Y siguierun el caminu
con lah botah y lah ehcopetah a cuehta.
amuyendu lah patatah
y vinierun y leh di una arroba
y un cuartiyu’e vinu,
¡Si ehqui tamién son jombrih
y tienin mu jonduh idealih!
Polqui mira,
una guerra eh lo peol,
Y el’olvíu…
el’olvíu eh com’un fuego
que tó lo devora y arruina.
...
Habla Dulce
...
a la cimará e la siera,
mi cabayinu bandoleru,
en lus'ojuh’e lah mujerih
que aún guardan el recuerdu
mu paentru en lah'entrañah
y en el jierru de la voz que clamaba
y no s'oía.
Se enfrentaban y mataban luh’ermanuh,
comu lobuh carruñeruh.
Amuh,
amuh prehtu ayí arribina,
mi cabayinu ligeru,
a ehcuchal.luh suh relatuh
y a querel·luh comu se quieri
al amigu sinceru.
...
Luh camaradah
...
Payí arribotona,
en lu artu'e lah cumbrih,
andabna luh cabreruh
alró lah cabrah y el chiveru,
y lu vierun tóo,
com'un ecu atronandu en la cabeza.
Sí, sí, en’ehti mehmu pueblu,
en’el Torno, en la sierra,
vierun salil pal frenti
a Jacintu y a tíu Pablo,
a Silvianu y a tiu Eladio,
a tíu Pelajiguh y a Ahteriu el Rata
y a muchuh otruh, comu hermanuh.
Y lah mairih,
y luh’ijuh chequininuh,
comu’na diminuta gota d’ehperanza
aguardarun el regresu.
Y vieruni a Adolfo Izquierdo
ehcondíu en lah’Erah Jondah,
endihpuéh lu bien que s’había portau con to’er pueblu.
Peru hoy ya s’han íu,
luh probih guerriyeruh,
ya no quean en la sierra,
Solu el’ecu de lah piedrah
y el águila oteandu lah chozah'e piedra.
...
Habla un jovin torniegu
...
ehtaban ahcondíuh
en lah majanerah'e l'Ehtoria
aguardandu a que gorvieran
con Dulce y cumpañía
de güerta a la sierra,
lah mocinah, luh mocinuh
dehta la muehtra sierra
El’otru día
ehtuvierun pahquí mehmu
ayenandu el orvíu de memoria,
en’el yanu Vaquerizah,
y cantaban y reían
y recitaban versuh tielnuh
¡Y mu alegrih andaban!
Porqui eyuh,
eyuh son l’esencia y la yerba güena,
de luh canchuh, de luh roblih,
de loh tiempuh venieruh
y tamién ehtaba eya
Durci comu la miel
una mujé juerti,
jonda y morena,
y s'abrazaba a Pinto
y ehtaban confundíuh
dambuh ya en la tierra.
...
Habla Dulce
...
Yo loh viY guardu esi momentu en la sesera
pa endihpuéh ehpal·cil·luh pol’uh’airih
paqui tó er mundu lu sepa
Amuh, amuh ayí arriba,
mi yegua primeriza,
súbime a luh cieluh,
Pa que ajondi mih raicih
Y m’ehparza eternamenti
en lah Vaquerizah'e la sierra.
...
Habla Dulce juntu al su cahtañu
...
Tengu sed,
Darmi agua,
darmi mucha agua
que quieru cumpartirla,
pa lah cabrah,
pa loh chotinuh,
que vienin toituh luh díah a velmi ,
pa luh niñuh que juegan
en la juenti nueva,
a bolindrih y a peonzah
y a jacelmi caraba tierna.
Porqui tóoh m’engendran
y m’aventan,
yo soy la tierra,
eyuh la sementera que se riega
pa una nueva cusecha.
...
Yo oh saqué de l’ehpesura de la Ehtoria
con la mi Voz dormida
y ya no oh’abandonu.
Aquí’eju el mi sembrau,
unuh libruh y un cahtañu
y luh versus en luh labiuh.
...
Dulce Chacón, en las Vaquerizah pa siempri y, manqui pasi el tiempo, en luh muehtruh corazonih presenti, y en El Torno, Dulcimenti.
Setiembre 2004
No hay comentarios:
Publicar un comentario