SÁBADO, DICIEMBRE 20, 2008
Mar de nubih preñáh de nievi,
mar de nieblah invernalih
en luh canchalih del Jerti,
y lus’ojuh elauh’e luh cabreruh
endi luh barandalih'e la sierra
oteandu pahmauh el urizonti.
Velayí ajuían luh guerriyeruh
polah cumbrih máh cimerh,
velaíli con’el su futuru incieltu
en luh tiempuh aqueyuh.
Y eyuh, valientih y señeruh
comu una daga ar vientu
sorbían blanca lechi
en lah ubrih’e luh vientuh
pa golihqueá ehperanza de vía güena.
Luh guerrilleruh'e la sierra
ya lucin con lah ehtreyah
en la nochi clara que ilumina la tierra.
Ay, mah’er tiempu gorvía
con puñalih de finu yelu
trayendu lah suh vocih
polah sierrah torniegah
jaciendu preguntinah ciertah
a lus'ijuh de la su nacencia.
Y el ecu regilaba polah laerah abaju
pa que no moh orviemuh
de luh ermanuh muertuh
que yacin baju la tierra
comu animalih salvajih
abandonauh al desamparu
al que luh cunfinó una cruel
y fraticida guerra.
¿Jahta cuandu derramauh
luh suh cuerpuh en luh campuh,
en lah cunetah yertah,
en lah fosah comunih
a la puerta'e luh cementeriuh?
Mar de nubih
en lechuh de carámbanuh y nieblah
arruyandu sentimientuh
de jombrih güenuh
pa que luh güesuh fríuh
que alimentan la tierra
se regüervan contra el orvío,
se levantin comu linternah
en meyiu'e lah turmentah.
Mar de nubih, sí,
mar de vientu y sementera,
en luh campuh, en la concencia
en el alientu de luh lobuh
que envenenan de libertá la sierra.
¿Jahta cuandu su dormital
en la trihti y fría tierra?
Luh guerrilleruh’e la sierra
ya lucin con luh luceruh
al nacel el alba y al cael la niebla.
Anónimo dijo...Hola Pablo, que tal amigu. T'e otorgau'l Premiu Red Hispania "Amor a España". Si quieris puées pasal pá enteralti pol el mi cuaelnu 'e bitácora
lanuestrapalra.blogspot.com
Paurega dijo...Muchah graciah amiguinu, eh tóo un onor jormá parti de la Red Hispania.
Pablo
No hay comentarios:
Publicar un comentario